|
|
 |
| Cultuur |
 |
|
IK HEB ZAIN
Age van der Velde
Veur n poar centen per dag bewoakt e fietsen in de stalling om houk bie kerk. Zien moagere lief in t vaalbroene pak is houkeg, onhandeg en groot.
Schelden en vluiken gaait hom makkelk òf en hai spijt peuken van sigeretten op stroat.
Mor ik heb zain, dou e eem nait keek, hou zien haand zaacht kop van n hond aaide, zo'n moager schurfteg baaist.
Ik heurde zien stem dij zee: "idioot, wat dust doe doar nou in regen en bragel, of hebben ze die ook n bedie gek moakt?"
Zie gezicht, mit n veul te laange board, staait haard en òfwiezend as wat. As je hom wat vroagen kikt e nait ains op, hai gaait gewoon zien aigen weg. Je maarken noeit bie hom wat e denkt, wat e vuilt. Gain mins dij hom aigenlieks kent en ik vroag mie òf wat ter in dij keerl leeft: 'wel is dij verbitterde vent'.
Mor ik heb zain, dou e eem nait keek, hou e op knijen ging veur wat dat leek op n lutje vogel: t was n baang muske dij doar op de stoupe lag. Ik heurde hom zeggen: "wees mor nait baang, kom mor, loat mie ains zain was der mit die aan haand is; joa lutje vrund, de wereld is sums haildal idioot".
Zien kroug is t verlengstuk van thoes. Hai zopt zok regel-moateg een stuk in de kroag. As krougholder ropt: "k goa sloeten, goa nou ook mor noar hoes", din gromt e: "joa, genog veur vandoag".
Onderwegens daauwelt e laangs de holten barak woar e mörgen weer fietsen bewoaken gaait; dij moagere, kleurloze keerl in t vaalbroene pak, dij dut asof niks hom nog roaken kin.
Het verhaal is met toestemming van de schrijver geplaatst. Verhalen die op deze website vermeld staan mogen niet
zonder schriftelijke toestemming van de schrijver worden overgenomen of worden gebruikt voor andere doeleinden.
|
|
 |
|
|
